Chimaev UFC tarixini qayta yozmoqchi: uchta vazn toifasida chempion bo‘lish reallikga qanchalik yaqin?

Xamzat Chimaevning UFC chempionlik kamariga bo‘lgan besh yillik uzoq safari nihoyasiga yetdi. Ammo “Borz” erishilgan natijada to‘xtash niyatida emas. U hatto Drikus Du Plessis ustidan g‘alaba qozonishidan avval ham UFC-da uchta vazn toifasida chempionlik kamarini qo‘lga kiritish imkoniyatini ko‘rib chiqayotganini aytgan edi. Birinchi qadam allaqachon tashlandi va Chimaev rejasini amalga oshirishi mumkin deb hisoblash mumkin. Biroq buning uchun bir nechta muhim omillar amalga oshishi shart.

Chimaev Makhachev, Ankalayev va Pereyra bilan jang qilishni istaydi

ESPNga bergan intervyusida Xamzat Chimaev o‘z oldiga katta maqsadlarni qo‘yganini aytdi. Uning so‘zlariga ko‘ra, u ham vazn tushirish, ham esa yarim og‘ir vazn divizioniga o‘tish variantlarini ko‘rib chiqmoqda. “Borz” ehtimoliy jangchilar qatorida Shon Striklend, Magomed Ankalayev va Aleks Pereyrani tilga oldi. Shuningdek, u 77 kg vaznga tushish ehtimolini ham istisno qilmadi va bu orqali UFC P4P reytingida birinchi o‘ringa chiqish imkoniyatini ko‘rayotganini bildirdi.

“Ko‘ramiz, Makhachev – Maddalena jangida kim g‘olib bo‘ladi. Agar Islom yutsa, bu men uchun P4P reytingida yetakchilikka chiqishning eng tez yo‘li bo‘ladi,” — dedi Chimaev.

UFC prezidenti Dana Uayt: Chimaevning rejalari va UFC 321-dagi ehtimoliy ishtiroki

UFC prezidenti Dana Uayt odatda chempionlarning turli vazn toifalarida “sakrashini” ma’qullamaydi. Chunki bunday holat da’vogarlar navbatini cho‘zib yuboradi va vaqtinchalik kamarlarni joriy qilishga olib keladi. Shu bois UFC rahbariyati chempionlik imkoniyatini, odatda, ikki holatda beradi: agar sportchi o‘z divizionini tozalab chiqqan bo‘lsa yoki u haqiqiy superyulduz bo‘lsa. Xamzat Chimaev misolida aynan ikkinchi holat kuzatilmoqda.

“Borz” yaqinlashib kelayotgan UFC 321 turnirida, Abu-Dabida (BAA) oktagonga chiqishni xohlamoqda. Esda tutish kerak, Xamzat ushbu mamlakat fuqaroligiga ega va UFC-ning Yaqin Sharqdagi turnirlari u uchun deyarli “uy turnirlari” hisoblanadi. Shu sababli uning istagi tushunarli. Biroq bu vaziyat og‘ir vazn toifasidagi jangchilar — Tom Aspinall va Siril Gan uchun unchalik ham quvonchli bo‘lmasligi mumkin. Chunki ular ehtimoliy ko-meyn statusida qolishadi. Lekin oxir-oqibat qarorni kim beradi? Ular shunchaki shartnoma asosida jang qiluvchi sportchilar, xolos.

Chimaev yarim o‘rta vaznda qanday qilib chempion bo‘lishi mumkin?

Xamzat Chimaev bugun UFC-dagi haqiqiy yulduzlardan biri. Shuning uchun Dana Uayt uning uchun vazn toifalariga oid har qanday istisnoni amalga oshirishi mumkin. Eslatib o‘tamiz, “Borz” avval 77 kg vaznda chempionlik uchun da’vogar bo‘lgan, biroq vazn tashlash jarayonida muammoga duch kelib, qo‘shni divizionga o‘tishga majbur bo‘lgandi.

Chimaev o‘zi qaytib yarim o‘rta vaznga tushish variantini ko‘rib chiqayotganini bildirgan. Ammo uning faqat chempionlik jangi evaziga oktagonga chiqishi ehtimoli yuqori. Savol esa shunda: bunday dominant kurash ko‘rsatayotgan Chimaevga kim raqobat qila oladi?

Agar chempionlik kamarini Islam Mahachev qo‘lga kiritsa, bu MMA olami uchun katta voqea bo‘ladi. Hammamiz bilamizki, Chimaev o‘tmishda Habib Nurmagomedov jamoasi bilan mojaro qilgan, hatto “Burgut”ning ukasi Abubakar bilan janjallashgandi. Ha, hozir munosabatlar tiklangan va jangchilar bir-biriga hurmat bilan qarashadi, ammo Chimaev va Islamni yaqin do‘stlar deyish qiyin. Shuning uchun ularning o‘rtasida jang tashkil etilishi mumkin.

Islam va Shon jismoniy taraflama yutqazadi, amaldagi avstraliyalik chempion Maddalena esa nazorat va “teykdaun”larni yoqtirmaydi. Faqat mag‘lubiyatsiz qozoq jangchisi Shavkat Raxmonovga qarshi bo‘ladigan jangda ma’lum darajada intriga saqlanib qoladi. Ammo shuni ham unutmaslik kerakki, hatto oddiy zarbachi sifatida tanilgan Ian Machado Gerri ham Shavkatning orqasini egallagan edi. Xamzat esa o‘zining odatiy agressiv uslubi bilan Shavkatni albatta yerga tushirishi va qulay pozitsiyada bo‘lishi kutiladi.

Shunday ekan, agar Chimaev yarim o‘rta vaznga o’ta olsa, uning chempion bo‘lish ehtimoli yuqori, deyish mumkin. Keyin esa savol tug‘iladi: undan keyinchi?

Yarim og‘ir vaznda Chimaevga qarshi tura oladigan kurashchilar juda kam

Xamzat Chimaevning tana vazni mavsumlar oralig‘ida ba’zida 100 kilogrammgacha chiqadi. Shunga qaramay, u semirib ketganday tuyilmaydi, aksincha, massali va mushakdor ko’rinadi. Shu sababli zaruriy tayyorgarlik bilan “Borz” bemalol 93 kg vaznga ko‘tarilishi mumkin. Hozir bu divizionda Magomed Ankalayev yetakchilik qilmoqda. Chimaev avgust oyi boshida Ankalayev va Aleks Pereyra o‘rtasidagi revansh g‘olibi bilan UFC 320-da jang qilish ehtimolini ham istisno qilmadi. Nega bo‘lmasin?

Yarim og‘ir vaznda kuchli kurashchilarni topish mushkul. Maqolalarda aytilganidek, “kunduz chiroq yoqib izlasang ham” topilmaydi. Ankalayev raqibini yerga tushira olishi mumkin, ammo uning “teykdaun”lari uncha samarali emas. Qolaversa, uni Chimaevni cho‘chitadigan darajadagi gigant jangchi deb ham bo‘lmaydi.

Ochig‘ini aytganda, Aleks Pereyra Chimaev uchun uncha qiyin raqib emas. Chunki “Poatan”ning kurash uslubi deyarli yo‘q. Irji Proxazka parterda qanday harakat qilishni biladi, ammo chex jangchi katta gabaritga ega emas. Uning na jismoniy kuchi, na texnikasi Chimaev ostidan chiqib ketishga yetarli bo‘ladi. Shunday ekan, “Borz” ikkala jangni ham muddatidan oldin yakunlashi mumkinligi ehtimoldan xoli emas.

Agar 77 kg vazn toifasida yuqori darajadagi bazaviy kurashchilar bor bo‘lsa, 93 kg-da asosan zarbador jangchilar to‘plangan. Ularning eng yaxshisi raqibning “teykdaun”lariga qarshi himoyani ko‘rsatishi mumkin, ammo bu Chimaevni to‘xtatish uchun yetarli emas. Chunki u baribir birinchi raunddayoq raqibini yerga tushiradi. “Borz” uchun ringning narigi tomonida kim turgani katta farq qilmaydi.

Hamma narsa UFC rahbariyati va Chimaevning o‘z xohishiga bog‘liq. Matchmeykerlar yaxshi tushunib turibdiki, hozir “Borz” top-3 darajadagi yulduz hisoblanadi. Dana Uayt ham allaqachon Chimaevning MMA tarixidagi eng katta yulduz bo‘lish imkoniyatini ta’kidlagan. Bu esa shuni anglatadiki, UFC prezidenti jangchini kelgusida faol ravishda targ‘ib qilishga yordam beradi. Turli vazn toifalaridagi chempionlik kamarlarini qo‘lga kiritish esa Chimaevning “hayp poezdi”ni kosmik tezlikkacha olib chiqishi mumkin.