Barselona Manchester Yunayted bilan Markus Reshfordni ijaraga olish bo’yicha kelishuvga erishdi

Fabritsio Romanoning ma’lum qilishicha, Markus Reshford Manchester Yunayteddan Barselonaga doimiy sotib olish opsiyasi bilan ijaraga o’tish arafasida turibdi.

“Here We go! Barselona Manchester Yunayteddan Markus Reshfordni ijaraga olish bo’yicha kelishuvni ma’qulladi,” deya yozdi Romano ijtimoiy tarmoqlarda.

27 yoshli hujumchi — Manchester Yunaytedda o’n yil davomida 426 ta o’yinda 138 ta gol urgan — kelasi hafta Barselonada tibbiy ko’rikdan o’tishi rejalashtirilgan.

Reshfordning Kamp Nouga o’tishi Barselonaning asosiy maqsadlari — Athletic Bilbaoda qolishni tanlagan Niko Uilyams va Liverpuldan juda qimmat bo’lgan Luis Dias bilan kelisha olmaganidan keyin amalga oshdi.

Manchester Yunaytedning bosh murabbiyi Ruben Amorim Reshfordni Aston Villadan ijaradan qaytganidan so’ng o’z rejalariga kiritmagandi. Ilgari Reshford kiygan 10-raqamli forma endi Mateus Kunyaga berilgan.