Super Formula chempioni Sho Tsuboi Haas bilan ilk F1 sinovini o’tkazadi

Formula 1 jamoasi Haas Super Formula chempioni Sho Tsuboi kelgusi oyda Fuji trassasida VF-23 mashinasida TPC sinovini o’tkazishini tasdiqladi.

Toyota zavodi haydovchisi Haasning zaxira piloti Ryo Hirakava bilan ikki kunlik sessiyada navbatma-navbat ishlaydi — bu Tsuboi uchun Formula 1 mashinasini boshqarishdagi ilk tajriba bo’ladi.

“Menga bu ajoyib imkoniyatni bergan Haas jamoasi va TGRga minnatdorchilik bildiraman. Albatta, F1 mashinasini haydashni juda kutayapman. Bu kunni mukammal o’tkazishni va umrimda bir marta beriladigan imkoniyatdan foydalanib, orzularimni ro’yobga chiqarishni xohlayman!” deya Tsuboi ijtimoiy tarmoqlarda yozdi.

Bu imkoniyat Haas va Toyota o’rtasidagi hamkorlikning bir qismi hisoblanadi — Hirakava jamoaning mashinasini bir necha bor, jumladan bu yil Bahrayn va Ispaniyada FP1 sessiyalarida boshqargan, Ritomo Miyata esa Xeresda sinovlarni yakunlagan.

Hozirda Super GT reytingida peshqadam va Super Formulada uchinchi o’rinda turgan Tsuboi, o’tgan mavsumda TOM’S jamoasi bilan Fujida uch g’alaba qozonib, Super Formula chempionligini qo’lga kiritgan.