Boloniya Chiro Immobile bilan shartnoma imzoladi

Boloniya rasman Chiro Immobile bilan shartnoma imzolaganini e’lon qildi — u Serie A tarixidagi eng samarali hujumchilardan biri. Klub bu haqda payshanba kuni e’lon qildi.

35 yoshli hujumchi Italiya chempionatida ajoyib natijalarni qayd etgan — to’rt marta eng yaxshi to’purar bo’lgan, bir marta Torino va uch marta Latsio bilan.

Serie A’dagi faoliyati davomida Immobile 353 ta o’yinda 201 ta gol urgan. Bu natija uni Serie A tarixidagi eng ko’p gol urgan futbolchilar qatoriga qo’shdi:

• Silvio Piola – 274 gol
• Francesko Totti – 250 gol
• Gunnar Nordal – 225 gol
• Juseppe Meazza – 216 gol
• Jose Altafini – 216 gol
• Antonio Di Natale – 209 gol
• Roberto Badjo – 205 gol
• Chiro Immobile – 201 gol

Bolonyaga o’tishidan oldin Immobile sakkiz mavsumni Latsio safida o’tkazdi — u o’tgan mavsumda klubni tark etgan edi.