Kremoneze Speziyaga qarshi dramatik g’alabadan so’ng A seriyasiga qaytdi

Kremonese playoff o’yinida Speziyani 3:2 hisobi bilan mag’lub etib, Italiya A seriyasiga chiqish yo’llanmasini qo’lga kiritdi, deya xabar bermoqda DAZN.

Manuel De Luka ikki gol kiritib ajoyib o’yin ko’rsatdi, Michel Kolokolo esa mehmonlar uchun yana bir golni yozdirib qo’ydi. Eslatib o’tamiz birinchi o’yin durang bilan yakunlangandi.

“Bu mavsum biz erishgan barcha yutuqlar bilan yodda qoladi: kuchli iroda va katta intilish bilan biz yuqori ligaga chiqishni ta’minladik,” dedi Kremonese bosh murabbiyi Giovanni Stroppa.

Kremonese 3:0 hisobida oldinga chiqqanidan so’ng, Francesko Pio Esposito va Luka Vinyali Speziya uchun gol urdilar, bu esa o’yinning yakuniy daqiqalarini keskinlashtirib yubordi.

Stroppaning jamoasi B seriyasi g’olibi Sassuolo va Filippo Indzagi boshchiligidagi Piza bilan birga yuqori ligaga ko’tarilganlar ro’yxatini to’ldirdi va bu ularning A seriyasida so’nggi ishtirokidan ikki yil o’tganidan keyingi qaytishi bo’ldi.