Rafael Benites Angliya Premier ligasi yoki Italiya A seriyasida ishlashni istayotganini ma’lum qildi

Rafael Benitez — taxminan bir yil oldin Selta Vigoni so’nggi bor boshqargan va murabbiylikka qaytish istagini bildirdi. Ispaniyalik mutahassis Angliya Premier ligasi va Italiya A seriyasida ishlash istagi borligini bildirdi.

Tajribali murabbiy hozirda UEFA texnik kuzatuvchisi lavozimida ishlamoqda va bu vazifa unga o’yinlarni kuzatish va yosh murabbiylar bilan o’z tajribasi bilan o’rtoqlashish imkonini beradi.

“Men Premier ligani o’yin shiddati va sur’ati tufayli yaxshi ko’raman. Men futbolchilarni va muhitni bilaman, lekin Italiya ham menga yoqadigan mamlakat,” deya Benites ESPN ga ma’lum qildi.

Liverpul va Real Madridning sobiq murabbiyi ta’sirchan yutuqlarga ega. Jumladan ikkita La Liga tituli, Italiya kubogi va yigirma yil oldin Liverpul bilan tarixiy Championlar ligasini yutgan.

“Men har qanday taklifga ochiqman. Men hali ham kuch-quvvat va tajribaga ega bo’lganim uchun murabbiylik qilishni xohlayman. Qiyin tomoni raqobatlasha oladigan jamoa topish,” deya qo’shimcha qildi 65 yoshli murabbiy.